Letër Qytetarëve të Kosovës
Të dashur qytetarë,
Kosova ndodhet në një moment vendimtar. Pas shumë vitesh tensione politike, stagnimi ekonomik dhe krizash të panevojshme institucionale, qytetarët kanë humbur besimin se shteti mund të funksionojë seriozisht, me stabilitet dhe me vizion afatgjatë.
Për vite me radhë, politika është konsumuar në konflikte të brendshme, propagandë dhe polarizim. Ndërkohë, familjet janë përballur me rritje të kostos së jetesës, pasiguri ekonomike, mungesë perspektive për të rinjtë dhe dobësim të shërbimeve publike. Shumë qytetarë sot nuk kërkojnë më premtime të mëdha; kërkojnë shtet funksional, institucione serioze dhe qeveri që punon.
Kosova nuk ka nevojë për një tjetër cikël krizash politike. Ka nevojë për drejtim. Ka nevojë për stabilitet. Ka nevojë për zhvillim.
Prandaj ky program nuk është ndërtuar si listë premtimesh elektorale. Ky është një plan qeverisës për transformimin ekonomik, institucional dhe strategjik të Republikës së Kosovës gjatë viteve 2026–2030.
Ky program mbështetet mbi tri shtylla themelore:
- SIGURIA, si parakusht për shtet të fortë dhe ekonomi stabile;
- ENERGJIA, si bazë e zhvillimit industrial dhe pavarësisë ekonomike;
- ZHVILLIMI, si rezultat i punës, investimeve dhe institucioneve funksionale.
Ne besojmë se Kosova mund të bëhet shtet modern evropian vetëm nëse ndërton ekonomi prodhuese, administratë profesionale, drejtësi funksionale, arsim të lidhur me tregun, dhe partneritet të fortë me SHBA-në, NATO-n dhe Bashkimin Evropian.
Për të jetësuar këtë vizion, planprogrami ynë zbërthehet në 6 shtyllat strategjike të programit tonë:
- Siguria Strategjike dhe Partneriteti Ndërkombëtar
- Zhvillim Ekonomik, Drejtësi Efikase dhe Partneritet me Sektorin Privat
- Siguri Energjetike dhe Infrastrukturë Moderne
- Edukimi Profesional dhe Lidhja e Arsimit me Tregun
- Rritje Ekonomike si Bazë për Politikën Sociale
- Shëndetësi e Siguruar dhe Shërbime me të Vërtetë Falas
Ky është vizioni ynë për Kosovën: jo shtet i krizave të përhershme, por shtet i sigurisë, zhvillimit dhe besimit.
Më 7 qershor, ju e keni në dorë të zgjidhni midis atyre që vazhdojnë të ushqehen me urrejtje e fyerje, dhe rrugës tonë, rrugës së punës, qetësisë dhe vizionit afatgjatë.
Unë jam gati. Aleanca është gati.
Për SIGURI, ENERGJI, ZHVILLIM, gjithmonë për Kosovën që e duam me gjithë zemër. Për Andrrën e Kosovës tonë të jashtëzakonshme.
Na priftë e mbara!